البحث

موال النهار - عبد الرحمن الابنودى

عدّى النهار
و المغربية جايّة
تتخفّى ورا ضهر الشجر
و عشان نتوه في السكة
شالِت من ليالينا القمر
و بلدنا ع الترعة بتغسل شعرها
جانا نهار مقدرش يدفع مهرها
يا هل ترى الليل الحزين
أبو النجوم الدبلانين
أبو الغناوي المجروحين
يقدر ينسّيها
الصباح
أبو شمس بترش الحنين؟
أبداً..
بلدنا ليل نهار
بتحب موّال النهار
لما يعدّي في الدروب
و يغنّي قدّام كل دار
و الليل يلف ورا السواقي
زي ما يلف الزمان
و على النغم
تحلم بلدنا
بالسنابل والكيزان
تحلم ببكره
و اللي حيجيبه معاه
تنده عليه في الضلمة
و بتسمع نداه
تصحى له من قبل الأدان
تروح تقابله في الغيطان
في المتاجر و المصانع.. والمعامل
و المدارس.. والساحات
طالعة له صحبة
جنود
طالعة له رجال..
أطفال.. بنات
كل الدروب واخدة بلدنا للنهار
و احنا بلدنا ليل نهار
بتحب موال النهار
لما يعدي في الدروب
و يغني قدّام كل دار

غناء: عبد الحليم حافظ - عام 1967

امجاد يا عرب امجاد - عبد الفتاح مصطفى

أمجاد يا عرب أمجاد
فى بلادنا كرام أسياد أمجاد يا عرب أمجاد
إيش تروى الجبال الشم
من سيرة رجال أبطال
تكتبها السيوف بالدم
مسطورة على الرمال
أجدادنا فخر الأجداد
أولادنا يا زين الأولاد
أمجاد يا عرب أمجاد
يارابط عجال النوك
ياسايم رعيل الخيل
خليها تهز قلوب سباقة رياح الليل
عبارة على الوهاد يحكمها رجال شداد
أمجاد يا عرب أمجاد
يانافخ على النيران ومدوى الطبول رعود
تأتينا نشد رسال ناشعين للكفاح أسود
مخلوقة ليوم جهاد صبارة على الجلاد
أمجاد يا عرب أمجاد *

1- غناء كارم محمود - عام 1953
2- غناء: عبد الحليم حافظ عام 1974 فى ذكرى تأسيس إذاعة "صوت العرب" 

يا طالع الشجرة - على الحجار



كنت أتفكر فى تاريخ طويل من التنكيل بالكلمة من قبل الأنظمة السياسية فى مصر، وما تبدار لذهنى ذلك السؤال وإن بدا ساذجاً:
"ما الذى تفعله الكلمة أو القصيدة حتى يتم منعها؟"

دولا مين - سعاد حسنى

احمد فؤاد نجم

خلال معارك أكتوبر 1973 ذهبت " سعاد حسنى " إلى الإذاعى " وجدى الحكيم " وقالت له : أنا عايزة أغنى للأبطال وأسمعته الكلمات التى كتبها الشاعر " أحمد فؤاد نجم " والتى لحنها الموسيقار " كمال الطويل " فقال لها الإذاعى وجدى الحكيم : وأين الشاعر ؟ وهنا دخل إلى المكتب الشاعر" أحمد فؤاد نجم " وقال للإذاعى " وجدى الحكيم " : أنا أرسلت سعاد حسنى لأننى لو حضرت سوف ترفض الكلمات لأنك لا تحبنى ، فقال له وجدى الحكيم : لا .. أنا بحب الكل ، وهنا قال الشاعر : إذن أنا فهمت غلط ، وسجلت سعاد حسنى " دولا مين " واذيعت لأبطال مصر والأمة العريية وكانت من الاغنيات الجميلة التى تغنت بالنصر العظيم وأبطال مصر.

يا بيوت السويس - عبد الرحمن الابنودى

يابيوت السويس يابيوت مدينتي
استشهد تحتك وتعيشي انتي
يابيوت السويس
يابيوت السويس
هيلا هيلا هيلا يالله يابلديا
شمر درعاتك الدنيا اهيه
وإن باعوا العمر في سوق المنية
رفاقة هانروح السوق نجيبه
ونعود ونغني ع السمسية
ليكي يامدينتي
ياللي صمدتي
يابيوت السويس
استشهد والله ويجيى التانى
فداكي وفدا اهلي وبنياني
اموت وياصاحبي قوم خد مكاني
دا بلدنا حالفة ماتعيش غير حرة
قفلت بيتي وسكيت دكاني
ياشطي وبحري وشبكي وسفينتي
يابيوت السويس
يابيوت السويس
والله بكرة ياعم ابورية
لهاتضحك واحنا ماشيين سوية
ع المينا ولا عند الزيتية
وهاتاخد ابنك وبنتك ومراتك
ونعدي على نفس لمعدية
ونقول يادنيا والله وصدقتي
يابيوت السويس
يابيوت السويس
وان عشنا وانا كنت شديد متعافي
أنا لأحمل توبك على لحم كتافي
وأقضي يومي عرقان وحافي
وإن قدمي اتعفر بالرمل الأصفر
لأغطس قدمي ف البحر الصافي
وتعودي احسن من يوم ماكنتي
يابيوت السويس

غناء: محمد حمام - اصدار: 1970

الليلة يا سمرا - فؤاد حداد

البنت قالت فستاني
منشور على الشط التاني
خدني المراكبى و عدّني
و رجعت فى القَمَرَه
الليله يا سمره يا سماره
الليله يا سمره
الليل يصَبَّح و يمَسي
و تفكرينى و تنََسِّي
وافطم على ريقك نَفْسي
واتوب من الخمره
الليله يا سمره يا سماره
الليله يا سمره
العنجريب اللي قنيته
تَمَن سنين استنيته
على الجريد اللي بنيته
ح تزهّر التمره
الليله يا سمره يا سماره
الليله يا سمره
يا اللي صفيحتك بغوايش
عايش و لا لغيرك عايش
قلبي و لا البحر الطايش
عيني و لا الجمره
الليله يا سمره يا سماره
الليله يا سمره
أشرد من الظبي الشارد
و ارجع لارضك اتشاهد
و اقول يا وعد اللي يجاهد
على خيلك الضامره
الليله يا سمره يا سماره
الليله يا سمره
قال فينا غنوه و حدودته
قال ما فيناش قولة توته
ماهيش عجينه و ملتوته
كل القلوب حمرا
الليله يا سمره يا سماره
الليله يا سمره
خلّي الندى من احلامك
يسقي النبات من ايامك
حطّي اللي خلفك قدّامك
تلقى البلد عامره
الليله يا سمره يا سماره
الليله يا سمره

1- غناء: محمد حمام
2- غناء: محمد منير - البوم "شبابيك" 1981
3- غناء: فرقة شاركس - البوم "شاركس" 1984
4- غناء: احمد منيب - البوم "يا عشرة" 1986

اوبريت الوطن الاكبر - احمد شفيق كامل

يوم ورا يوم أمجاده بتكبر
وانتصارته مالية حياته
وطني بيكبر وبيتحرر
وطني وطني
[عبد الحليم حافظ]
وطني يا مالى بحبك قلبى
وطني يا وطن الشعب العربى
يالى ناديت بالوحدة الكبرى
بعد ما شفت جمال الثورة
انتا كبير كبير كبير و اكتر بكتير
من الوجود كله من الخلود كله
يا وطنى
[صباح]
حلو يا مجد يا مالى قلوبنا
حلو يا نصر يا كاسى رايتنا
حلوة يا وحدة يا جامعة شعوبنا
حلوة يا أحلى نغم في حياتنا
يا نغم سارى بين المحيطين
بين مراكش والبحرين
في اليمن ودمشق وجدة
نفس الغنوة لأجمل وحدة
وحدة كل الشعب العربى
[فايدة كامل]
قوميتنا اللى بنحميها
اللى حياتنا شموع حواليها
جنة بتضحك للى يسالم
وجحيم ثاير على أعادينا
شوفوا بيروت بعد العدوان
الإستعمار فين والطغيان
كبر الشعب وقوته سادت
وبورسعيد حكايتها اتعادت
عاش وانتصر الشعب العربى
[شادية]
وطني يا أغلى وطن في الدنيا
وطني يا قلعة للحرية
أنتا البانى مع البانيين
وأنتا الهادم للعبودية
الصوت صوتك حر وعربى
مش صدا شرقى ولا صدى غربى
ياللى ترابك كحل لعينى
يالى هواك عطرة بيحينى
انتا حبيبى يا وطني العربى
[وردة]
وطني يا ثورة على استعمارهم
إملا جزايرك نار دمرهم
لو نستشهد كلنا فيك
صخر جبالنا راح يحارربهم
الاستعمار على ايدنا نهايته
راح من الدنيا زمانه ووقته
لا الجزاير ولا في عمان
تهدا الثورة على الطغيان
الا بنبض الشعب العربى
[نجاة الصغيرة]
وطني يا جنة الناس حسدنها
على أمجادها وعلى مفاتنها
يالى قنالك رجعت ملكك
وأنتا الخير الدنيا صاينها
على السد وخد من خيره
صنع وازرع وابنى في نوره
ياللى علاك في قلوبنا عبادة
يا وطن كل حياته سيادة
وطن العزة يا وطنى العربى
[عبد الحليم حافظ]
وطني يا زاحف لإنتصاراتك
ياللى حياة المجد حياتك
في فلسطين وجنوبنا الساهر
هنكملك حرياتك
أحنا وطن يحمى ولا يهدد
أحنا وطن بيصون ما يبدد
وطن المجد يا وطني العربى

غناء: عبد الحليم حافظ وصباح وفايدة كامل ووردة وشادية ونجاة الصغيرة - عام 1959