يا فنارة لفى المينا خلى السفينة تعدي
وان سالوكى البحارة اتعاجبى واقفى وردى
دي قنالنا ودى اراضينا اتفضل شوف يا اخينا
لفي ووريه يا فنارة يا فنارة
يا سفاين فوتى وفوتى فى قنالنا الحرة الرايقة
والليل والنار والغارة وعيال الناس في الحارة
وبنية بتبقي يتيمة وعمارة بتبقى حجارة
لو واحد م البحارة عايز يعرف يا فنارة
لفي ووريه يا فنارة يا فنارة
فى مكان القنابل بتميل السنابل
فى مكان الزوابع بتدور المصانع
بنعلى المبانى ونغنى الاغانى
قتلوا الشمس مرة وجبنا الشمس تانى
خلى البحار يملى عيونه من نور بلدى
خلى البحار يفرد صدره لنسمة بلدى
ويشوف الضحكة فى عين ولدى
الضحكة شوارع مرصوفة
انا ضحكة ابنى موصوفة
لو واحد م البحارة عايز يعرف يا فنارة
لفي ووريه يا فنارة يا فنارة
الفنارة
اشعار: عبد الرحمن الابنودى
غناء: عبد الحليم حافظ
الحان: عبد العظيم محمد
الاصدار فى: عيد الجلاء
السنة: 1966
التصنيف: وطنى