خلاص كبرنا على الشيكولاتة خلاص كبرنا
وزهقنا من لعب المساكة فتناه لغيرنا
وقلوبنا صبحت مشغولة بالحب للمرة الأولى
مسكنا فى جناحه وطار بينا ع الجنة طرنا
خلاص كبرنا
الساعة 9 بالثانية كنا تملى فى سرايرنا
دلوقتى احنا حاجة تانية الحب جانا وغيرنا
بنام ونصحى على كيفنا حسب ما تؤمر عواطفنا
لقينا ان السهد تاعبنا لكن سهرنا
وعرفنا ان الشوق دوبنا لكن صبرنا
خلاص كبرنا على الشيكولاتة خلاص كبرنا
كنا بمرايل وضفاير راضيين بحالنا
من مدرستنا على بيتنا دايماً فى حالنا
لحد ما الحب قابلنا فى يوم ونادى وشغلنا
فرحنا وارتاحت له قلوبنا فى طريقه سهرنا
وعرفنا يومها اننا عشقنا خلاص كبرنا
خلاص كبرنا على الشيكولاتة خلاص كبرنا
كانت دادتنا بتحكيلنا حكايات على قد عقولنا
وكنا لما بنسألها ع الحب تتهرب منا
دلوقتى احنا اتنصحنا وعرفنا معناه وارتاحنا
قولنا لداداتنا كلام امبارح احكيله لغيرنا
احنا انشغلنا وفكرنا سارح وخلاص كبرنا
غناء: الثلاثى المرح - اسطوانات صوت الفن 1963