يا اسكندرية بحرك عجايب
يا ريت ينوبني من الحب نايب
تحدفني موجة على صدر موجة
والبحر هوجة والصيد ما طايب
اغسل هدومي.. وانشر همومي
علي شمس طالعة وانا فيها دايب
كأني فلاح من جيش عرابي
مات ع الطوابي وراح في بحرك
كأني نسمة فوق الروابي
م البحر جاية تغرق في سحرك
كأني كلمة من عقل بيرم
كأني غنوة من قلب سيد
كأني جوه المظاهرة طالب
هتف باسمك وراح معيد
يا اسكندرية يا مصراوية
على سن باسم
على ضحكة هلة
البحر شباك ومشربية
وانتي الاميرة ع الدنيا طلة
وفيكي خمري يا اسكندرية
سلمت أمري يا اسكندرية
مقدرش اشوفه
وما اغنيلوش
يا اسكندرية عاشق وبدي
ارتاح في حضنك الود ودي
يكون كلامي عربون غرامي
وبالمحبة ناخد وندي
يا اسكندرية فيكي الغلابة
ع الرزق يسعوا ولا يناموش
نزل شبكهم في بحر طامي
طلع شبكهم على فشوش
وفيكي بين البشر ديابة
وفيكي فوق البشر وحوش
وفيكي ناس مغرمين صبابة
لو خان زمانهم ما بيخنوش
وفيكي خمري يا اسكندرية
سلمت امري يا اسكندرية
مقدرش اشوفة وما اغنيلوش
غناء: الشيخ امام عام 1976
غناء: محمد منير - البوم "يا اسكندرية" عام 1990
غناء: احمد منيب - البوم "قسمة ونصيب" عام 2001