من صغر سنى على أرضك حبيت حبيت
وكنت اتمنى أعمل بنا وابنى البيت
وفى ضيك العالى من أول ندا لبيت
زى القصب والعيدان والسنبله شبيت
يا مصر وعشقت فيك الدنيا والأيام
فجر وضحى ومغربيه وليل يزيدنى هيام
وعشقت معنى الكلام يهدينى أسرارك
وطرح نخلك عشقت وقلب جمارك
يا مصر يا اللى سمارك شمسى وافريقي
جمعت قلبى وكنت فى قلبى وفى ريقي
فرقت قلبى ونابك كل تفريقي
احلف بروح العطش لما السواقى تدور
وبالعيون اللى مايشبعش منها النور
أنا كل دقه فى قلبى أدنت فرضك
أصل الكرامه ترابك والشرف عرضك
من صغر سنى على أرضك حبيت حبيت
غناء: محمد طه - اغانى المسلسل الاذاعى"موال لبلدى" 1973