غلبنا الشوق جرينا وراه وحبينا
وطار النوم سافرنا معاه ولفينا
اتارى الليل عشقنا هواه غدر بينا
ما نابنا غير رجعنا بقلب مش لينا
ياريتنا ما روحنا ولا جينا
انا وعينى ونار قلبى من صغرنا عايشين
نشوف السحر ونخبى ونكايد العاشقين
لحد الشوق ما صحانا
فى ليلة وصحى معانا
على هاتف وكان صاحبنا قابلنا وحيانا
بضحكة الورد يستنى مواسمها
وكلمة الحب يعرفها وفاهمها
وجت فينا ولا درينا
ومن يومها غلبنا الشوق جرينا وراه وحبينا
ياريتنا ما روحنا ولا جينا
رضينا بالقدر يكتب علينا شوق ويغلبنا
وقولنا للهوى طيب حرام تشبكنا وتسيبنا
خدنا وروحنا بلاد الله نسأل على اللى جرحنا هواه
قالولنا غيركم سبق وانتوا اللى ساعدتوه
الحب كان عندكم وانتوا اللى ضيعتوه
صحيح والله احنا اللى ضيعناه الله يجازينا
صحيح والله ياريتنا كلمناه يوم ما ضحك لينا
وادى احنا من يومها عايشين على يومها
ومن يومها غلبنا الشوق جرينا وراه وحبينا
ياريتنا ما روحنا ولا جينا
غناء: سعاد محمد