حبيبى عدى وفات النهاردة
الصبح بدرى ورمالى وردة
ده كان واحشنى بقاله مدة
حبيبى عدى وفات النهاردة
بقاله مدة شهرين واكتر
ما حد شافه معرفش ليه
وفضلت ادور عليه وافكر
واقول حبيبى جراله ايه
زعلان ما نعرف
تقلان ما نعرف
ومين يقولى وازاى راح اعرف
وصدفة عدى شوفته النهاردة
وعند بيتنا ميل وهدى
اتارى قلبه مليان مودة
حبيبى عدى وفات النهاردة
هاستنى بكرة يمكن يعدى
واخلى عينيا تتهنى بيه
واجيبله اجمل ياسمين مندى
ضماه بأيدى هدية ليه
اقوله كلمة ويقولى كلمة
الحرف منها بألف كلمة
والحب يشهد على الكلام ده
والفرحة ترقص من الجمال ده
ده كان واحشنى بقاله مدة
حبيبى عدى وفات النهاردة
حبيبى عدى وفات
غناء: نجاح سلام
اشعار: كامل الاسناوى
الحان: محمد محسن
التصنيف: عاطفى