يا سايق الغليون عدى القنال عدى
وقبل ما تعدى خد مننا وادى
ده اللى فحت بحر القنال جدى
بحر القنال يا كترها رماله
وجدنا فوق الكتاف شاله
بحر القنال اتبدلت حاله
وجدنا متهنى بعياله
واحنا على الشطين مفتحين العين
عارفين طريقنا منين
واللى صديقنا فين
يا سايق الغليون
دى أرضنا.. وأرضنا لينا
ضرب الرصاص للى يعادينا*
دي أرضنا وترابها أجدادنا
ضرب الرصاص للى يعاندنا
النخلة للطالع.. والأرض للزارع
وبكرة للصانع.. والكون أهو سامع
يا سايق الغليون
المال حلال... دم وعرق ودموع
يا بنايين ابنولنا في المشروع
المال حلال حا يرخص الغالى
يا بنايين ابنولنا في العالى
المسطرين فى الإيد.. والعزم عزم حديد
هانبنى عهد جديد
ونعيش زماننا فى عيد
يا سايق الغليون
(*) فى الحفلات كان يغنيها عبد المطلب (هايشوف هوان اللى يعادينا)
يا سايق الغليون ع القنال
اشعار: صلاح جاهين
غناء: محمد عبد المطلب
الحان: محمود الشريف
التصنيف: وطنى