كل الحاجات بتفكرني
بعيون حيرتها تحيرني
والذكرى مش بتصبرني
تمر صورتك أتبسم
الابتسامة تعذبني
كل الحاجات حواليا تدور
زي الحيطان بتداري النور
وقلبي من بعد الطيران
ما حيلته إلا جناح مكسور
دلوقت مهما أقول الآه
وانت بعيد مين يسمعني
كل الحاجات إلا عيونك ممكن أنسى
كل الحاجات من حواليا عارفة وحاسة
ضاع الونس يا قمر غايب
بعدك ماليش أي حبايب
دلوقت حتى بخاف حزني يبعد عني
كل الحاجات كانت تضحك لما أقابلك
لا عرفت نفسي من بعدك ولا من قبلك
قبلك ما كانليش ولا حاجة
بعدك سنيني محتاجة
يا ريت تشوف دمعة صوتي لما بغني
كل الحاجات بتعذبني ونا وحداني
تهرب قصادي وتقولي: ما تجيش تاني
دور على اللي كان وياك
تحت الورود نايمة الأشواك
كل اللي يومها فرحته معاك بيعذبني
غناء: محمد منير - البوم "يا شيكولاتة" 1989