نشيد اليوم يومك ياجنود - لحن معسكر الجنود
اليوم يومك ياجـــــنود ماتجعليش للروح تمن
يوم المدافع والبارود مالكيش غيره في الزمن
هيا اظهري عزم الأسود في وجه أعداء الوطن
عار على الجندي الجمود إلا إذا لفه الكفن
زعبلة
على السماء خلو الهجوم لو كانت الأعدا النجوم
وزلزلوا الأرض إذا جـــــارت على الأرض الخصوم
يسمع صوت بوري من الخارج
الجميع
البوري بيندهلك اسمع منه الـصوت
بيقولك فوت أهلك واستهتر بالموت
أحيينا سعداء وأمتنا شهداء
أحيينا سعداء وأمتنا شهداء
ينزل زعبلة من أعلى التل ومعه حورية
زعبلة
ياحياة الروح هل حــالك حالي
تذكرين الوصل في تلك الليالي
هل يزور الطيف ميدان القتـالِ
أم يحول العمر من دون الوصالِ
في رضا الأوطان إني لا أبــالي
إنما الإقدام من شأن الرجــالِ
حورية
سر وعد بالنصر من مولى الموالي
ياحبيبا سار في نيل الـــمعالي
الجميع
هيا بنا هيا بنا نشرب ونرقص كلـنا
ونضحكوا ونلعبوا ونقوم نودع بعضنا
زعبلة
احنا الشباب من طبعنا
نفدي الوطن بروحـــنا
الجميع
هيا بنا هيا بنا نشرب ونرقص كلـنا
ونضحكوا ونلعبوا ونقوم نودع بعضنا
زعبلة
دفع البدل جبن وكسل
يعر شبان عصرنا
نمحي العدا ونروح فدا
في حب مجد بلادنا
الجميع
هيا بنا هيا بنا نشرب ونرقص كلـنا
ونضحكوا ونلعبوا ونقوم نودع بعضنا
ادينى اهو جيتك بدرى - لحن لقاء الحبيبين
حورية: أديني أهو جيتك بدري وحدي أجري
قوم حط إيدك على صدري تلقاه ياسلام
زعبله: مع الأسف أنا ماقدرشي مادمت ف الخدمة نوباتشي
حورية: الجو راق ولا فيش معنا شئ يمنعنا
وأي فرصة تمتعنا غير دي ياسلام
زعبله: مع الأسف أنا ماقدرشي مادمت ف الخدمة نوباتشي
حورية: إن كنت أقوللك أنا يعني قوم دلعني
يصيح برضك تلطعني كداهو ياسلام
زعبله: مع الأسف أنا ماقدرشي مادمت ف الخدمة نوباتشي
حورية: والله إن مارديتش عليَّ تبقى رزية
أخنق رقبتي بإيديا كــــــــداهو
زعبله: ياسلام .. محروقة الخدمة وشغلتها
أهي باينه وعارف لبتها
أنا رايح أعصى بالعنية دي الرقص وياكي بالدنيا
تحيا الاميرة شهرزاد - لحن استقبال الاميرة *
الجنود: تحيا الأميرة شهرزاد ذات العفاف والأبهة
اللي بقت كل البلاد من فوق لتحت تحبها
يابختها
الخاتونه: أحب أشوفكم ع القلعة واقفين ثابتين
وفي الميدان زي الولعة رايحين جايين
واللي أشوف قوة سيفه لازم أرقيه على كيفه
يركب فرس ويا الحرس ويشوف فرصة يفرح بها
الجنود: تحيا الأميرة شهرزاد ذات العفاف والأبهة
اللي بقت كل البلاد من فوق لتحت تحبها
يابختها
الخاتونه: العسكر الله يكترهم ويقويهم
أنا اللي عارفة مقدارهم وأرقيهم
واللي تبان منه القوة يبقى الوحيد عندي هوه
أنظر إليه وأعطف عليه وأديله حاجة يحبها
الجنود: تحيا الأميرة شهرزاد ذات العفاف والأبهة
اللي بقت كل البلاد من فوق لتحت تحبها
يابختها
انا المصرى كريم العنصرين
زعبله: أنا المصري كريم العنصرين
بنيت المجد بين الاهرامين
جدودي أنشأوا العلم العجيب
ومجرى النيل في الوادي الخصيب
لهم في الدنيا آلاف السنين
ويفنى الكون وهم موجودين
وأقول لك ع اللي خلاني أفوت أهلي وأوطاني
حبيب أوهبت له روحي لغيره لا أميل تاني
احسن جيوش فى الامم جيوشنا - لحن استعراض الجيش
الجنود: أحسن جيوش في الأمم جيوشنا وقت الشدايد تعال شوفنا
ساعة مانلمح جيش الأعادي نهجم ولا أي شئ يحوشنا
الخاتونه: مستقبل الأمة بين إيديكم في الوقت ده نعتمد عليكم
ردوا آدي الشعب بيناديكم بيقول لكم احفظوا شرفنا
الجنود: أحسن جيوش في الأمم جيوشنا وقت الشدايد تعال شوفنا
ساعة مانلمح جيش الأعادي نهجم ولا أي شئ يحوشنا
زعبله: آدي جنودنا وآدي بنودنا وفي الدفاع والهجوم تجدنا
مالناش صناعة غير الشجاعة وللجهاد ربنا خلقنا
الجنود: أحسن جيوش في الأمم جيوشنا وقت الشدايد تعال شوفنا
ساعة مانلمح جيش الأعادي نهجم ولا أي شئ يحوشنا
دقت طبول الحرب ياخيالة - لحن الحرب
الجنود: دقت طبول الحرب ياخيالة وآدي الساعة دي ساعة الرجالة
زعبله: انظروا لأهلكم نظرة وداع مرة مافيش بعدها إلا الدفاع
الجنود: دقت طبول الحرب ياخيالة وآدي الساعة دي ساعة الرجالة
وعندما ترقي الأميرة شهرزاد البطل زعبله إلى رتبة باش سنجق دار تقول:
الخاتونه: اسمعوا الأمر الجديد
البنات: اسمعوا الأمر الجديد
الخاتونه: كلكم من تحت أمر باش سنجق داري الوحيد
الجميع: ليحيا باش سنجق دارنا اللي مشرف عسكرنا
قرة أدم وقمع الدولة وميرشاه: أما عجايب أما تباته
تبقى فضيحة وتبقى شماته واحد يعلى واحنا تلاته
لازم احنا نكون الأول قرة أدم أوغلي وقمع الدولة
حورية: لسه أنت يازعبله صغار وازاي هتصبح سنجق دار
زعبله: ستي الخاتونه حبيتني شافتني عاقل رقيتني
حورية: ياخوفي بس لاتنساني وتشوف غيري
زعبله: وفين أروح من وجداني ولا ضميري
الخاتونه: الحب عماهم ونسوني وأنا واقفه وشايفه بعيوني
بزيادة يابنت ده مش وقته خليني أكمله درجته
الخاتونه: امسك ياشاطر سيف أبويا ف إيدك
تستاهل الترقية الله يزيدك
الجميع: امسك ياشاطر سيف أبوها ف إيدك
تستاهل الترقية الله يزيدك
الخاتونه: السيف ده غالي وأنت له تستاهل
ده أصله سيف بابا ماهواش ساهل
سلمتهولك لما شفتك راجل تزينه لما تمسكه بيمينك
الجميع: امسك ياشاطر سيف أبوها ف إيدك
تستاهل الترقية الله يزيدك
الجنود: تنتصر ونرتفع والأعادي تتخذل
روح يازعبلة تنتقم وعود لينا فايز بطل
قرة أدم: كلام في كلام منام في منام
قمع الدولة: مش راح ينفع ولا يتمتع
أبدا أبدا ان شاء الله
جند: راح يتمتع غصب عنكم
الجميع: بكرة حانسمع ان شاء الله
زعبله: دوسوا الأعادي بالقدم ماحناش في وقت الإنتظار
املوا نفوسكم بالهمم واملوا السما والأرض نار
ياعسكري اللي ينهزم يقع في عار وأي عار
وإن داس على النفس وهجم ربك كفيل بالإنتصار
البوسته جاية - لحن ساعي البريد
البنات: البوسته جايه البوسته جايه أيوه هيه أيوه هيه
الساعي: حلمكم ياولاد عليه دا انتم زغللتم عينيه
بنت: أنا قبلكم شوف لي اسمي
الساعي: من عينيه آدي اسمك .. وانتي ياختي
بنت: شوف لي عندك اسم خضره
الساعي: وآدي اسمك أنتي رخره
بنت: اقروا يالا وبشرونا وأنا راجع للخاتونه
أخرى: نقرا قبلا الأولاني
أخرى: ياختي سيبي
لما أشوف قبله اللي جاني من حبيبي
بنت: وأنتي ليه يعني جوابك له علامة
أخرى: الحبيب منصور وراجع بالسلامة
بنت: ياحلوللي انشالله ياختي
بنات: يبقى من بختك وبختي
الجميع: امتى هيجونا وطمن عليهم
واحنا ننزل بوس وعض وحضن فيهم
دول عساكرنا اللي جاهدوا وشرفونا
حظهم وأنسهم واجب علينا
ادى الشمس والقمر
الجميع: آدي الشمس والقمر في ساعة هنية
ساعة ماجه مالسفر حبك ياحورية
حوريه: ياحبيبي غبت عني كنت واخد قلبي مني
كنت في الحرب ناسيني ياترى ولا فاكرني
الجميع: مين يقول أنه نساكي ياما بات شاكي وباكي
لو جابوله الملك كله يستحيل ينسى هواكي
زعبله: أنا لا ألام في حبي يامنى روحي وقلبي
دعوني أمير للغيرك وأنا في الغرام أسيرك
أنا روحي وفؤادي بين إيديكي يامرادي
ياحوريه ياملاكي كل ما أملك فداكي
مهجتي عقلي صوابي
الجيش رجع م الحرب - لحن عودة الجيش
الجنود: الجيش رجع م الحرب بالنصر المبين والدنيا هايصة والأهالي فرحانين
بعسكر الدولة اللي عادوا منصورين رافعين بنادقهم وفاردين العلم
الخاتونه: تعال ياباش سنجق دار قوللي يا روحي ع الأخبار
قوللي الحكاية كلها م الإبتداء للإنتهاء
زعبله: أول مارحنا بالعساكر من هنا واخدين معانا أكلنا وشربنا
عشان ما أرضيكي وأرضي ربنا ساعة عساكرهم ماشافوا وشنا
لقينا سنجقهم جري !!! كمل بقى ياعسكري
عسكري: اتفركشوا زي الغنم اللي انهزم واللي اتلخم
واللي وقف زي الصنم واللي أكلها بالصرم
أتابي دول عسكرهم عدم
زعبله: أول ماشفت المسألة مارضيتش أضرب قنبلة
تروح خسارة في الخلا عشان عساكر بالبلا
لهم دقون مدلدلة وجاكيتات مهلهلة
قلت ياواد إيه العمل ماتسعفكش إلا الحيل
أطبخ لهم نسخة سطل جبنا الطاطورة والعسل
وخليناهم في الحلل وحطينا الشئ ع الجبل
نطوا عليها بالعجل واللحس واللهط اشتغل
الجميع: سبنا الأعادي مغروزين زي البصل
مافيش واحد منهم وصل لأهله يحكي اللي حصل
زعبله: وآد يالحكاية كلها م الإبتداء للإنتهاء
الجنود: الجيش رجع م الحرب بالنصر المبين والدنيا هايصة والأهالي فرحانين
بعسكر الدولة اللي عادوا منصورين رافعين بنادقهم وفاردين العلم
هلا بتضلوا معايا هون - لحن قصة المؤامرة
هلا بتضلوا معايا هون شويه مقام نهاوند
الميرشاه
هلا بتضلوا معايا هون شويه
بدي أحكي لكون قصه تاريخيه
ها الخاتون كان لها جده أكوس منها
إلها عشيق كان بتحبه بقلبها ودينها
ها الزلمة كان مثلها وهي مثله
زلمة قيافة بيليق لها وهي بتليق له
وجهه كان منيح نطقه كان فصيح
منيح فصيح منيح
فضت من شانه أودة في آخر الدهليز هيدى
نص الليل بتخش له مابعرف شو بتعمل له
وقت اللي بيسمع فيها بسمع دبة إجريها
اجرتشن واجرترن هيك خطوة خطوة خطوة
ليلة عم بيستناها مثل عوايده وياها
بلقى يابوي عشر زلمات في ايديهن عشر طبنجات
كان بده يفتح تمه جاته رصاصة بعين امه
ياباي
هلا فهمتوا ها القتله بتسويها بزعبلة
الميرشاه امسك اجريها قمع الدوله يشد ايديه
قره آدم أوغلي في المصران
الخاتون: تفاجئهم بدخولها
مالكم يارجالة بتعملوا مؤامرة على مين
الغيظ على وجوهكم باين
الثلاثة
دا فعل زعبلة الخاين خلانا نصبح متآمرين
الخاتون
الليله نقتل زعبلة جزاء خيانته للدولة
والليله بيكايد فيه بايت يدلع في حورية
الثلاثة
احنا الثلاثة خدامك وحياة عظمتك ومقامك
لنجيب دماغه قدامك ونعمله كبه نيه
زفوا العروسة للعريش الجميل - لحن الزفة
الجميع: زفوا العروسة للعريس الجميل زينة العرسان
دا البدر يتمخطر وجنبه تميل وردة البستان
زعبله: الليلة اتهنى وأشوف ف المنام صدرك الهزاز
أفرح ويسقيني كاسات المدام خدك الغماز
الجميع: زفوا العروسة للعريس الجميل زينة العرسان
دا البدر يتمخطر وجنبه تميل وردة البستان
حوريه: إنت ظهر نجم سعودك وأنا الزمان عوض صبري
الليلة حلوة بوجودك ما تنكتبش من عمري
الجميع: زفوا العروسة للعريس الجميل زينة العرسان
دا البدر يتمخطر وجنبه تميل وردة البستان
بنات: يارب تجعل في ليالي السعود طالع النجمين
واجعل سهامك في عيون الحسود واحرس الاتنين
الجميع: زفوا العروسة للعريس الجميل زينة العرسان
دا البدر يتمخطر وجنبه تميل وردة البستان
زعبله: ممنون ومتشكر لكم إن شالله عقبال عندكم
ياللا بقى من فضلكم خلونا نقعد وحدنا
الجميع: عاوزنا نخرج كلنا
زعبله: عجايب أمال نصكم
الجميع: بالم العروسة تغلبك وتعذبك
زعبله: مش شغلكم
الجميع: بقة نلم بعضنا بالليل ونتعب نفسنا وتطردونا من هنا
زعبله: أمال تباتوا عندنا
أما أرازل كلكم مافيش حيا في وشكم
الجميع: طب مش حانخرج ياأمير ولو نبات تحت السرير
أحدهم: أيوة وأنا أقف غفير
زعبله: ياخوانا إيه الشغل ده هي اللياقة تكون كده
يعني النهاردة العرس ده معمول لنا ولا لكم
الجميع: معمول لكم معمول لنا أهو فرحنا كلنا
والرك كله ع الهنا
أحدهم: آنستنا
آخر: الله يحفظك
آخر: شرفتنا
آخر: الله يسترك
آخر: الليلة زاهية منورة أما معازيم مسخرة
إن كان جدع ولا مرة وأنا فاتحها مندرة
زعبله: انجروا داهية تسمكم
الجميع: طيب وإيه يعني السبب
زعبله: يالا بلاش قلة أدب
يالا اخرجوا يالا اخرجوا
الجميع: طيب حانخرج
زعبله: اخرجوا
افتح يا باش سنجق دار - لحن المؤامرة
الجميع
افتح
زعبلة
مين
الجميع
افتح ياباش سنجق دار
حورية
رجعم تاني
زعبلة
هس ماترديش
الجميع
افتح يالا أنتي وهو احسن نهجم بالقوة
زعبلة
خيراً مالكم عايزين إيه؟ مش روحتم راجعين ليه؟
الجميع
راجعين عشانك اخلص قوامك
البس حزامك واركب حصانك
عشان تسافر مع العساكر
دا الجيش بحاله رجع علينا
جمع رجاله بره المدينة
زعبلة
الليلة ليلة دخلتي يامغفلين
جايين تقلوا فرحتي متقصدين
الجميع
دا أكل عيشك وواجباتك
حاتنسى جيشك عشان مراتك
الأمر جالك تعرف خلاصك
ياتقوم تسافر ياقطع راسك
أبوحريشة
وآدي سيف أبو الخاتونة
حورية
والله سيف اسود علينا
زعبلة
أنا مسافر ياحورية يوم ولا يومين
حورية
الله يجازي الليلة دي حاتوديك فين
زعبلة
مطرح ماتقسم قسمتي لابد أظهر همتي
دي الحرب ديني وملتي وأنت روحي ومهجتي
إن مت أنا مايهمني إلا نهار ماتحزني
خلاص خلاص وآدي النفير وأشوف بقى وشك في خير
مين كان يقول الحرب حاتخلص - لحن الاحتفال بالنصر
الجميع: مين كان يقول الحرب حاتخلص الحرب كانت داهية تقيلة
عايزين بقى نشرب ونهيص في حب قمع الدولة الليلة
في صحتك ياسي قمع الدولة
قمع: هئ هئ هئ هئ هئ
الجميع: مبروك الدخلة
قمع: ماتشربوا
الجميع: بزيادة ماشربنا
قمع: الله اشربوا
الجميع: بالذمة شبعنا
قره أدم: اشرب افندم اشرب جانم خير موجود تكليف مش لازم
لازمة موسيقية
الجميع: المملكة زادت أنوار لما القمر طل عليها
المملكة عرفت تختار الفارس اللي يحميها
خاتونه: ياهادي الملك ياهادي تحرس شعبي وبلادي
فرحانين بفرح خاتونتهم كلهم أهلي وأولادي
الجميع: افرحي بجلالة قدرك يحرسك ويطول عمرك
أنت خاتونتنا وأميرتنا تأمري وننفذ أمرك
خاتونه: ياسلام ياسلام
الجميع: ياسلام على ليلة الدخلة وروايح قلع البدلة
والسهر للصبحية والنومة للضهرية
مالك ياباش سنجق - لحن اثر المؤامرة
مالك ياباش سنجق
الجميع وخاتونه:
مالك ياباش سنجق مالك
دا إيه ياعم اللي جرالك
حوريه:
في شرع مين يا اخوانَّا ياهوه
في شرع مين دا ياسيادي
تشحططوا جوزي وتاخدوه
وترجعوه بالحالة دي
الجميع:
مالك ياباش سنجق مالك
دا إيه ياعم اللي جرالك
الدنيا مايدومش فيها حال - لحن الختام
الجميع: الدنيا مايدومش فيها حال م الأحوال
أيام تمر وتتغير دولة ورجال
قره: قره أدم ممنون مسرور معلوم علشان رجع طرطور
ميرشاه: وأنا العالم فرج همي والله رجع لي خاتمي
قمع: وأنا حوشت واتجوزت واتهندست وسبحت في قلب الطشت
ياحلولي ياحلولي
مخ مخ: وأنا اللي طالع ع الحديدة الله يبارك لكم سعيده
الجميع: سعيده
زعبله: وأنا إيه بس اللي نابني بعد ماشفت الهموم
غير علق قلت مقامي شوفي تقطيع الهدوم
خاتونه: المقام محفوظ دي كانت بس غلطه
تتصلح حقك علي اتمنى تعطى
زعبله: أنا أتمنى الساعة دي ألقى نفسي في بلادي
هي أولى بجهادي من محياكي الجميل
أنا إن سالت دموعي ولا هبت نار ضلوعي
كل ده طالب رجوعي تاني للبر الأصيل
طول مانهر النيل بيجري أنا لا أنزل عمري
وإن حكمتي أي مصري فاحكمي ع المستحيل
الجميع: يالا حيوا دي الشهامة يالا سافر بالسلامة
شوف بلادك في مسرة أنت حر وهي حرة
قدمتها فرقة الشيخ سيد درويش عام 1921
قام مجموعة من الفنانين بإعادة تقديم الاوبريت فى الاذاعة عام 1957 وعام 1965
قامت سعاد حسنى بغناء مقطتفات من الاوبريت فى فيلم "اميرة حبى انا" عام 1974
