البحث

‏إظهار الرسائل ذات التسميات كمال منصور. إظهار كافة الرسائل
‏إظهار الرسائل ذات التسميات كمال منصور. إظهار كافة الرسائل

مأذون حارتنا - بديعة صادق ، نعمة /اشعار/ كمال منصور

مأذون حارتنا فى مندرتنا الليلة
زغروطة حلوة يا بنات العيلة
مأذون حارتنا جى لكتب كتابى
وفى مندرتنا اتجمعوا احبابى
والفرح سامعة دقته على بابى
والليلة تسوى الف ليلة وليلة
الورد من عند الحبايب جانى
يا مندرتنا وذوقوكى علشانى
واليوم ده صفالى زمانى
وجه يوفى بميعادى الليلة
املوا القنانى بالموارد املوها
واسقوا الحبايب والجيران اسقوها
وام العريس الغالية لا تنسوها
هى السبب فى الفرح كله الليلة
عقبال ما اغنى لكل واحدة شوية
والشمع اقيده دستتين فى ايديا
ليلة كتابكم والله ندر عليا
لاسهر معاكوا يا بنات العيلة
مأذون حارتنا فى مندرتنا الليلة
زغروطة حلوة يا بنات العيلة

مأذون حارتنا
اشعار: كمال منصور
التصنيف: اغانى افراح

غناء: بديعة صادق
الحان: احمد على
الاصدار فى: البرنامج الاذاعى "عقبال عندكم"
السنة: 1957

غناء: نعمة
الحان: سمير حلمى

نهاية حب / ياللى حبك كان رواية - محمد عبد المطلب /اشعار/ كمال منصور


ياللى حبك كان رواية
وانتهت قبل البداية
بكرة ياما تشوف ليالى
سهدها مالوش نهاية
بكرة راح تدبل ورودك 
من دموعك فوق خدودك
راح تلاقى كل دمعة
من ربيعك تطفى شمعة
والندم يطوى شبابك وابتسامك
والامل ما يدق بابك فى غرامك
ياللى حبك كان رواية
بكرة تتحايل عليا
تانى وتقولك عينيا
بعد ايه فات الاوان
وانتهى الحب اللى كان
واللى فاضل ذكريات
تتنسى ويا اللى فات
وابتدى ايام جديدة
ويا احلامى السعيدة
ياللى حبك كان رواية
مهما قلبى هان عليك
مش هاذله بين ايديك
ده الفراق احلى بزمان
من هوى فيه الهوان
مهما تبكى مهما تشكى
مستحيل تصعب عليا
عيش لوحدك ويا سهدك
وانسى ايامى الهنية
ياللى حبك كان رواية

نهاية حب / ياللى حبك كان رواية
غناء: محمد عبد المطلب
اشعار: كمال منصور
الحان: محمود كمال
الاصدار: من تسجيلات الاذاعة المصرية
السنة: 1960
التصنيف: عاطفى

كعب الزين ريال مدور - كارم محمود /اشعار/ كمال منصور


كعب الزين ريال مدور
ياما خلق ياما صور
صورها كحيلة العين
ابدع فيها جمال الكون
لو رسام يقضى سنين
ما بيقدر لجمالها يصور
كعب الزين ريال مدور
ياما خلق ياما صور
شعرها ليل بيضوى ضى
ويسبى كل شباب الحى
لو يلملحها غدير المى
عمر المى ما يوم يتعكر
كعب الزين ريال مدور
ياما خلق ياما صور
نظرتها كالسهم تصيب
وتشعلل فى القلب لهيب
ترمى بعيد وترمى قريب
مثل البرق فى لمحة ينور
كعب الزين ريال مدور
ياما خلق ياما صور
بنت الخال وبنت العم
ايش يقولوا قبالها ياعم
خفيفة الروح خفيفة الدم
خفة روحها شهد مكرر
كعب الزين ريال مدور
ياما خلق ياما صور
(موال)
يا حلوة ياللى جمالك
يحكى غصن البان
سبحانه من صورك
فى صورة الغزلان
يا اجمل بنات العرب
يا زينة العربان
يا شمعة ومنورة
جايبة ليالى البيد
يا وردة باسها الندى
ضحكت على الاغصان
كعب الزين ريال مدور
ياما خلق ياما صور
اوصافك ديما تتعد
مثلك والله ما فى حد
اصيلة الاب اصيلة الجد
حسنك لف البيد ونور
كعب الزين ريال مدور
ياما خلق ياما صور

كعب الزين ريال مدور
غناء: كارم محمود 
اشعار: كمال منصور
الحان: احمد صدقى
التصنيف: عاطفى

يا مقسمين النصيب خليتوا ايه ليا - عبد العزيز محمود /اشعار/ كمال منصور


يا مقسمين النصيب خليتوا ايه ليا 
من يوم ما غاب الحبيب ما شوفت حنية
انا العليل والدواء فى ارض محبوبى
امانة يا اهل الهوى تقروا له مكتوبى
قولوله طال بعدكم والرد ما جانى
وازاى اشوف حيكم واحيى الامل تانى
يا مقسمين النصيب خليتوا ايه ليا 
من يوم ما غاب الحبيب ما شوفت حنية
يا مقسمين النصيب ازاى بتنسونى
من يوم ما غاب الحبيب والدمع فى عيونى
صابر على قسمتى والحظ والمقدور
والصبر كان سلوتى والحب كاس بيدور
يا مقسمين النصيب خليتوا ايه ليا 
من يوم ما غاب الحبيب ما شوفت حنية
يا مقسمين النصيب لو تعطفوا مرة
وتردوا ليا الحبيب احكى له ما يجرى
ده انا العليل والدواء مخبى فى جفونه
واحكيله سر الهوى عن سحره وفنونه
يا مقسمين النصيب خليتوا ايه ليا 
من يوم ما غاب الحبيب ما شوفت حنية

غناء: عبد العزيز محمود 
اشعار: كمال منصور
الحان: عبد العزيز محمود
الاصدار: من تسجيلات الاذاعة المصرية
السنة: 1955
التصنيف: عاطفى

مونولوج الارنبة - احمد غانم /اشعار/ كمال منصور

ياللى غلبتى الارنبة فى السرسبة وكتر الخلف
كفاية دوسى فرملة بلا بهدلة غلب وقرف
انتى وجوزك محتاسين قاعدين تملى تفكروا
وعيالكوا لسة صغيرين ايش حال بقى لو يكبروا
وكل واحد له طلب من الاب اعجب من العجب
ومنين يكفى كل كده ليه الحياة تبقى كده
ده العيشة تبقى متعبة وانتى غلبتى الارنبة
خليتى جوزك يستدين ويستلف صبح ومسا
يا ام البنات يا ام البنين يا فاتحة فصل فى مدرسة
زى الجراد ياكلوا الظلط بالذمة ده اكبر غلط
جيبالنا دستة ليه بقى ليه الحياة تبقى شقة
ده العيشة تبقى متعبة وانتى غلبتى الارنبة

مونولوج الارنبة
غناء: احمد غانم
اشعار: كمال منصور
الحان: احمد صبرة
الاصدار: من تسجيلات الاذاعة المصرية
السنة: 1966
التصنيف: مونولوج

ماما يا حلوة - شادية /اشعار/ كمال منصور

ماما يا حلوة يا أجمل غنوة .. عايشة في قلبي وجوى كياني
غالية عليا وضي عينيا .. يا أول كلمة نطقها لساني
ماما يا ماما
إنتي يا ماما ملاك من الجنة .. تحت جناحك اعيش وأتهنى
إنتي حياتي و إبتساماتي .. إنتي منايا وكل هنايا
مين رباني مين .. ومين هناني مين
غيرك إنتي يا حلوة يا ماما .. ماما يا ماما
لما أضمك وتضميني .. تبقى الدنيا مش سايعاني
ويزيد شوقي وألقى حنيني .. بيخليني أضمك تاني
مين رباني مين .. و مين هناني مين
غيرك إنتي يا حلوة يا ماما .. ماما يا ماما
مهما الف الدنيا يوماتي .. ما ألقاش زيك في الدنيا دي
أسعد لحظة في كل حياتي .. لما ألاقيك يا ماما قصادي
مين رباني مين .. ومين هناني مين
غيرك إنتي يا حلوة ياماما .. ماما يا ماما يا حلوة
ماما يا حلوة يا أجمل غنوة .. عايشة في قلبي وجوى كياني
غالية عليا وضي عينيا .. يا أول كلمة نطقها لساني
ماما يا ماما

ماما يا حلوة
غناء: شادية
اشعار: كمال منصور
الحان: منير مراد
التصنيف: اغانى الاسرة

موجود فى كل وجود - كمال منصور

موجود فى كل وجود وانت الكريم يارب
وفى كل شئ معبود وانت العظيم يارب
يا عالم الاسرار ولا كلمة تخفى عليك
يا حى يا قهار والامر كله اليك
وفى كل شئ حكمتك ليها آيات وآيات
تشهد على قدرتك يا رافع السموات
عليك اعتمادى يارب
ولغيرك ما انادى يارب
وانت السميع يارب
وانت المجيب يارب
موجود فى كل وجود
الله الله الله الله الله
فى كل طلعة نهار
يارب انادى رضاك
وفى كل لمحة نظر
يارب بترجاك
افتح لى باب الهدى
امين يا هادى يا رحمن
واسمع يارب الندا
من طال الغفران
عليك اعتمادى يارب
ولغيرك ما انادى يارب
وانت السميع يارب
وانت المجيب يارب
موجود فى كل وجود
الله الله الله الله الله

غناء: محمد عبد المطلب

هلال رمضان - كمال منصور

هلالك فى السما نور
وعاد من تانى يا رمضان
وبدرك زاهى ومدور
وكان غايب بقاله زمان
شهور بتفوت وتطوى شهور
وطول العام بنستناك
ولما جيت ولاح النور
وكحلت العيون بثناك
حمدنا الله وكبرنا
وبيك الاهل بشرنا
وقولنا السعد وافانا
وشوفنا طلعته جانا
بخير وسلام على الاسلام
هلالك فى السما نور
نهارك طهر وعبادة
صلاة وخشوع
وليلك مدنة منقادة
ونور وشفوع
فيك المحروم بيتهنى
يا شهر الصوم
وايامك عليه جنة
وخير بيدوم
وفرح وعيد فى يوم ما تعود
هلالك فى السما نور
يا شهر الهدى والقران
هديت الكون
وجودك نفحة من الرحمن
على الصايمين
قلوبهم كلها ايمان
بحمد الله
يا هادى العاصى والحيران
لذكر الله
لتمجيده وتوحيده
هلالك فى السما نور

غناء: عباس البليدى - من تسجيلات الاذاعة المصرية عام 1952

حكايتى معاك - شادية /اشعار/ كمال منصور

حكايتي كانت وياك حكاية
قصة طويلة مالهاش نهاية
قضيت حياتك في نار وغيرة
وقلبي ياما حيرته حيرة
ياما ياما حيرته حيرة قلبي
لونسمة هبت في يوم عليا
يكرهها قلبك وبان عليك
لو وردة شافت في يوم عينيا
ليه شوكها دائما يجرح ايديك
لو نجمة ليلة طلت عليا
ليه القي دمعك يجري في عنيك
عذبت قلبك مابين ايديا
والحق كله ده كان عليك
ياللي غرامك سبب شقايا
حكايتي كانت وياك حكاية
فضلت احايلك واقول ده بكرة
يتوه وينسي القاك تزيد
ماكان في بالي ده كله يجرى
وكنت فاكرة حتكون سعيد
قلبك سقيته ودي وحناني
بنيت له جنة يتهني فيها
ورجعت احايله لقيته تاني
اوهامه تكبر ويعيش عليها
ضيع شبابي بدل هنايا
حكايني كانت وياك حكاية
ياما ليالي مرت عليا
ما شفت فيها وياك نعيم
ماشفت فيها غير الاسية
وسهد ليلي ويا النجوم
عش السعادة اللي بنيته
بالغيرة بعته والذنب ذنبك
صبرت قلبي لكن لقيته
من كثر ظنك كرهني حبك
والفرقة بينا كانت نهاية
حكايني كانت وياك حكاية
كانت وياك حكاية
ياما ياما حيرته حيرة قلبي

حكايتى معاك
غناء: شادية
اشعار: كمال منصور
الحان: محمود الشريف
الاصدار فى: اسطوانات مصرفون
السنة: 1958
التصنيف: عاطفى

الجزائر / قضبان حديد اتكسرت - كمال منصور

قضبان حديد اتكسرت والشمس طلعت نورت
أرض العروبه أرض البطوله أرض الجزائر
سنين طويله حرب ونضال
بين البطوله فوق الجبال شايلين سلاح
قصة كفاح أعجب وأغرب من الخيال
ختامها كان الإنتصار
والفرحه عمت كل دار
حتى الشهيد قام من جديد
في حفنة من التراب يبدء
من الفجر الجديد فجر الجزائر
حط الحمام فوق الزتون
وجناحه رفرف على الغصون
شال الحمام رمز السلام
دخل الحصون فتح السجون
وطار وجاب أحرارنا معاه
أحرار وضحوا بالحياه
شافوا العذاب من كل باب
ماستسلموش رفعوا العلم
علم الجزائر

غناء: عبد الحليم حافظ - عام 1962