البحث

‏إظهار الرسائل ذات التسميات محمود عفيفى. إظهار كافة الرسائل
‏إظهار الرسائل ذات التسميات محمود عفيفى. إظهار كافة الرسائل

قرب يا بكرة - محمود عفيفى

الماضى المر عدى واحنا ولاد النهاردة
عايشين بأمل جديد وارادة من حديد
بنقرب البعيد وبنزرع ألف وردة
الماضى المر عدى
مش ممكن ذكرياتنا تقفل طريق حياتنا
ده المستقبل قصادنا اجمل من اللى فاتنا
قرب يا بكرة يا منور بالامانى
قرب وافرش بلدنا بالورد وبالاغانى
يا مصانع ياللى دايرة بإرادة قوية حرة
صوت المكن بيهتف الثورة مستمرة
الثورة يعنى حركة مبتعرفش الجمود
ثورة يوليو المباركة مخلوقة للخلود
عايشين بأمل جديد وارادة من حديد
بنقرب البعيد وبنزرع ألف وردة
الماضى المر عدى

غناء: شفيق جلال

الجدعان - محمود عفيفى

حققنا لمصر امالها وسبقنا الدنيا بحالها
وده كله علشان جدعان جدعان جدعان
عدينا بحور ولا خوفنا ولا هدينا ووقفنا
والموج طاوع مجادفنا ووصلنا لبر امان
خلينا الصحراء شوارع وغيطان وبيوت ومصانع
وبنينا الهرم الرابع تحت الشمس فى اسوان
جدعان راسمالنا عرقنا وطريق الثورة طريقنا
ما نفرط يوم فى حقوقنا ولا ننسى واجبنا كمان
حققنا لمصر امالها وسبقنا الدنيا بحالها
وده كله علشان جدعان جدعان جدعان

غناء: المجموعة - من تسجيلات الاذاعة المصرية عام 1966

متسالنيش - محمود عفيفى

ماتسألنيش على قلبي اللي كان في ايديك
ولا روحى اللى ياما رفرفت حواليك
ماتسالنيش على حكايه كانت لي معاك
ووردة مافضل منها غير الاشواك
ماتســألنيش ده طول البعد بيقطع خيوط الود
ولما المية بتغيب يوم بيبخل عاالغصون الورد
ماتســـألنيش ولا تــفـكر ولا تدور على ذكرى
روح في طريق وانا في طريق
ويمكن نلتقي بكرا
يمكن وايه راح يجرى ما اعرفش
ده برضه العشرة ماتهونش
يجوز الشوق يرجعنا ..لكن ايمتى؟
ماتسألش وما وماتسألنيش

غناء: نجاة الصغيرة - الاذاعة فى عيد الثورة عام 1966

الشمس نازلة عروسة متحنية - محمود عفيفى

الشمس نازلة عروسة متحنية
ما يلا بينا نزوق الطبلية
المغربية قربت يا حبايبى
لقمة هنية تكفى ألف ومية
الشمس نازلة مروحة فرحانة
فايتانا للقمر الحليوة امانة
فايتانا للفوانيس وللأحلام
نسهر ويسهر حلمنا ويانا
والحلم اخضر كله نور وايمان
بيلمنا ويضمنا بحنان
بيعيش معانا شهر يسوى العمر
الحلو ده اسمه الكريم رمضان
اتلموا يا ولاد زى صحبة ورد
غنوا بفرحة كل مالهاش حد
رمضان بتاعكوا جى علشانكوا
مواعدكوا ولا عمره بيخلف وعد
يا سلام كده على طلقة المدفع
وساعتها صوتكوا الحلو بيلعلع
كأنكوا عصافير من الجنة
قلبى لكوا من فرحته غنى

غناء: الثلاثى المرح




راجع من السفر - محمود عفيفى

وقالولي راجع م السفر، وقالولي راجع
حسيت بإن الليل مشي، والفجر طالع
ولقيت بشايرك هلت عليا
والدنيا ضحكت قدام عينيا
يا للي انت راجع م السفر
وصيت عليك النسمة تحضن خطوتك
والورد يفرشلك عبيره في سكتك
والشمس ما بتحماشي
وانت في طريقك ماشي
زي الربيع بتصحي أملي بضحكتك
ياللي انت راجع م السفر
يا ألف أهلا بيك وسهلا يا حياتي
يا عمر قلبي وكل حبي وذكرياتي
دنا من زمان وأنا في انتظارك بالأماني
واما اتقابلنا انكتبلي عمر تاني
وعرفت أغني غنوتي ونسيت آهاتي
ياللي انت راجع م السفر

غناء: ليلى مراد