ما نرضاش يخاصم القمر سماه
ما نرضاش تدوس البشر بعضها
ما نرضاش يموت جوه قلبى نـدا
ما نرضاش تهاجر الجذور أرضها
ما نرضاش قلبي جواي يغني
الاجراس تدق لصرخة ميلاد
تموت حتة مني
الاجراس بتعلن نهاية بشر من العباد
دي الحكمة قتلتني وحيتني.. وخلتني
أغوص في قلب السر.. قلب الكون..
قبل الطوفان ما يجي
خلتنى اخاف عليكي يا مصر، واحكيلك على المكنون
مين الى عاقل فينا، مين مجنون
مين الى مدبوح من الالم
مين الى ظالم فينا، مين مظلوم
مين الى ما يعرفش غير كلمة نعم
مين الى محنيلك خضار؟ الفلاحين الغلابة.
مين الى محنيلك عمار؟ عمالك الطيابة.
مـين الى بيبع الضمير ويشترى بيه الدمار
مين هو صاحب المسألة
والمشـكلة والحكاية والقلم
رأيت كل شيء وتعبت على الحقيقة
قابلت في الطريق عيون كتير بريئة
اعرف بشر.. عرفوني لأ.. لأ ما عرفونيش
قبـلونى وقبلتهم
بمد إيدي لك.. طب ليه ما تقبلنيش
لا يهمني اسمك.. لا يهمني عنوانك
لا يهمني لونك.. ولا ميلادك، مكانـك
يهمني الانسان، ولو مالوش عنوان
يا ناس يا ناس يا مكبوتة
هي دى الحدوتة
حدوتة مصرية
غناء: محمد منير - فيلم "حدوتة مصرية" 1983