ذكريات
رجعتني الذكريات للي فات من حكاية لحكايات
فكرتني وافتكرت، وبخيالي هناك بعدت واتاخذت
فكرتني بالطفولة، واللي كان وقت الطفولة
وافتكرت سنين بعيدة، بعيدة مش سعيدة
واحنا في مصر الجديدة (ده كان زمان)
الجيران من كل جانب، كانوا أكثرهم أجانب
إنجليز حالهم يغيظ
والعجايب، كنت حاسس إني أنا وأهلي الأجانب
ذكريات، ذكريات
حتى أسماء الشوارع والمصانع كلها قدام عينيّ أجنبية
ذكريات، ذكريات
كنت تلميذ في ابتدائي وأصدقائي، يوم كده جوه في شارع جنب بيتنا
نطير طيارتنا اللي صانعينها بإيدينا إلتقينا
شلة من أولاد هناك إنجليز من سننا
بيطيروا هما كمان طيارتهم زينا، طيارتهم زينا
طيارتنا وطيارتهم مرت النسمة خذتهم شبكتهم عقدتهم وقعتهم
الأولاد الخواجات بالضرب هات فينا
ضربناهم برجلينا وإيدينا وانتهينا
في البوليس راحوا اشتكونا وجرجرونا وبهدلونا
إلتقينا في قسمنا اللي إسمه عربي
الشويش راجل أوروبي، إنجليزي وشه أحمر قال
Egyptians how dare you beat them?
Don't you know them?
دول حماية
إبتدى قلبي الصغير يدور عن جواب لسؤال يحير
إحنا مين في بلدنا ولاّ فين، فين؟
إلتقيت رد السؤال الإحتلال
الإحتلال ظلم وضلال
والذكريات للي فات رجعتني، رجعتني وفكرتني، وفكرتني الذكريات
الذكريات، الذكريات
أنا شفت العلم البريطاني، بيدنس نسمة أوطاني
منظر حسرني وبكاني، وخلاني كرهت أشوف ثاني
وفي علمي دريت دمع هواني
إزاي أوطاني الجبارة، محكومة بقصر وبسفارة
ولكل دخيل فيها إدارة، وجيوش محتلة ومخمورة
تنهب في بلدنا المأسورة
إزاي
وازاي في اللد وفي الرملة، كانت العملة مأساة كاملة
إستشهد أخويا في أراضيها بين روابيها
وحبيبته، خطيبته منساش لوعتها وكلامها لصورته
إزاي يا حبيبي إزاي غشوك، إزاي بسلاحك بإيديك قتلوك، قتلوك
إزاي
أسلحة فسدانة وخسرانة غشنا حكمنا ودسوها
ليه تاجروا فيها وقتلونا بيها ليه
وفي ليلة رهيبة والريح بتصفر وتزوم
ولا باينة نجوم القاهرة الساحرة الساهرة
إزاي بقت في لحظات كلها دخان ولهب ونيران
وصراخ وعذاب وخراب ودمار بتاكلها النار
القاهرة الساحرة، القاهرة الساحرة
إزاي
النيران صبحت رماد، واللهب في قلوبنا قاد رغم السكون
كان الغضب، الغضب بركان بيغلي، بيغلي في العيون كل العيون
وصحيت على ثورة بترج الدنيا، وصحيت على ثورة بترج الدنيا
ولقيت أوطاني حكمها في إيديّ وجمال قدامي بينادي عليّ
قوم إرفع راسك (قوم وإشبع حرية)
كنت في صمتك مرغم، كنت في حبك مكره
والله زمان يا سلاحي (الله أكبر)
إشتقت لك في كفاحي (الله أكبر)
إنطق وقول أنا صاحي (الله أكبر)
بعد طول الذكريات واللي فات من حكاية لحكايات
بصيت لطفولة أولادي، وبقيت أتصور أحفادي
بتغني وبتنادي بكرامة وسلامة
هنا وطن الحرية هنا حصن القومية، القومية العربية
أحرار في بلدنا في دنيتنا، ولا فيش في سمانا إلا رايتنا
أحرار ونحب الحرية، لبلدنا ولكل الدنيا ولكل الأمة العربية
يا بلادي
غناء: عبد الحليم حافظ - عيد الثورة الثامن 1960