افرش منديلك ع الرملة، وانا الف واجيلك ع الرملة
واقعد واحكيلك ع الرملة، واسمع مواويلك ع الرملة
افرش منديلك وناديلي وانا رهن إشارة يانوارة
بس انت لاغيني ورسيني يا ابو قلب شبكني بسنارة
منديل الحب طرف عيني، وبكلمة حتقدر تداويني
لو تفتح قلبك وتخليه ما يكونش في يوم بالقطارة
زوق منديلك بالترتر وانقش بالحنة على حروفه
وارسم قلبين لونهم يسحر يشبكهم سهم في طراطيفه
واديني وخذ من أشواق، كداب اللي يقول ده فراق
تفاريح الحب على جبينك لو طلت في مرايه تشوفه
الشهد بحاله ومحتاله يشهد لكلامك وطعامته
ولسانك لو قال مواله راح ادوب من رقته وحلاوته
في عينيك الحب بيتكلم ومعاك القلب قوام سلم
ومعاه سلمت انا سلاحي لجمال ما في زيه ولا شفته
وافرش منديلك ع الرملة وانا الف واجيلك ع الرملة
واقعد واحكيلك ع الرملة واسمع مواويلك ع الرملة
غناء: ماهر العطار - اسطوانات صوت القاهرة 1970