انا قلبي بابه حنين مفتوح للكلمة الحلوة
والكلمة ساعات بتفوت وتودي القلب في توكر
والآخر عقلى شاورنى وشاورته وجاتلى فكرة
غيرنا الباب والاوكرة وجيبنالهم قفل مسوجر
الهمسة كانت توصله يسهر مينامش الليل
والعين كانت تضحكله يصحى من سابع ليل
ويقوم على شوقة وفرحة يفتح من قبل ما يسأل
عمره ما يفكر يهرب غير بعد الحب ما يحصل
والآخر جاتلنا فكرة علشان منروحش فى توكر
غيرنا الباب والاوكرة وجيبنالهم قفل مسوجر
ياما قولت يا قلبى اتعلم مش كل كلام يتقال
نفرحله او نتألم ونشيل الهم جبال
الناس اشكال وطبايع والمخلص فيهم نادرة
فى المية يمكن واحد والألف بيصفوا لعشرة
والآخر جاتلنا فكرة علشان منروحش فى توكر
غيرنا الباب والاوكرة وجيبنالهم قفل مسوجر
متزعلش يا قلبى منى احنا استكفينا عذاب
اللى يعوزك يقابلنى وانا اللى افتحله الباب
وانا برضك ليا نظرة والخير هايعم عليا
يوم ما ترتاح هاينوبنى من راحة البال شوية
والآخر جاتلنا فكرة علشان منروحش فى توكر
سمكرنا الباب والاوكرة وجيبنالهم قفل مسوجر
غناء: شريفة فاضل