بنت بلدى اللى معايا فى كل مطرح
فى المصانع والمزارع حاجة تفرح
كل يوم بتزيد غلاوة اه يا سلام يادى الحلاوة
يا بنت بلدى
زى قرص الشمس فاردة خيوط دهب
فوق شواشى النخل وسباط الرطب
ماشية بتقول للوجود يسعد صباحك
بالعمل والهمة يالا خد براحك
مش بالخيال يا جدع
دى المعركة هى العمل
قولتلها هاتشوفى البدع
انتاجها يفوق الامل
الشغل واجب كل فرد
زى الصلاة والصوم ده فرض
كل يوم هانزيد غلاوة اه يا سلام يادى الحلاوة
يا بنت بلدى
على الشفايف دايبة حتة سكرة
والبنية ماشية والله منورة
قولت يادى الصبح الابيض
على الخلايق
ماشية واخدة السكة دوغرى مبدرة
شوفت فى عينيها الامل نور لبكرة
جمب اخوها فى العمل اسطاية شاطرة
دق قلبى وحبها
انا خدت بعضى
رحت اخطبها قالتلى اوفى بوعدى
قولت الجبل حطمت راسه
والسد قيمته من اساسه
كل يوم هانزيد غلاوة اه يا سلام يادى الحلاوة
يا بنت بلدى
يادى الحلاوة
غناء: اسامة رؤوف
اشعار: صلاح ابو سالم
الحان: محمد عبد العليم
الاصدار: من تسجيلات الاذاعة المصرية
السنة: 1967
التصنيف: وطنى