فكر قبلة وحكم عقلك
واوعى تجيب لمراتك ضرة
واسأل حتى وشاور صاحبك
واسأل غيره مرة ومرة
مش راح تخسر شئ بالمرة
ربك قال فى كتابه المنزل
شرعاً لك اكتر من واحدة
وكمان قالك لازم تعدل
بلا تمييز بين واحدة واحدة
وانت يا صاحبى مهما هاتعمل
ربنا قال مش ممكن تعدل
والابقى لك ام عيالك
وبيرضيها منك نظرة
وفكر قبلة وحكم عقلك
واوعى تجيب لمراتك ضرة
كل ما يجرى القرش فى ايدك
بتقول عايز اتجوز تانى
طب ما الاولى بقرشك بيتك
وهايملى افراح وامانى
اوعى تفرط فى ام عيالك
واوعى يغرك ابداً مالك
والابقى لك ام عيالك
وبيرضيها منك نظرة
وفكر قبلة وحكم عقلك
واوعى تجيب لمراتك ضرة
ام عيالك ست اصيلة
عايشة معاك على حلوة ومرة
واما تقولها كلمة جميلة
تسعد يومها وتسعد بكرة
وتخليها تعيش فى سعادة
وانت كمان ترتاح بزيادة
والابقى لك ام عيالك
وبيرضيها منك نظرة
وفكر قبلة وحكم عقلك
واوعى تجيب لمراتك ضرة
الاحوال الشخصية
غناء: العربى سلطان
اشعار: حسين الكومى
الحان: سيد مكاوى
التصنيف: مونولوج