خلاص بقيتوا طولى وكلكوا حماس
ايه العمل قولولى فى حبكم يا ناس
صغيرين كبار وعندكوا افكار
وبتحبوا الاغانى ونشرة الاخبار
يا حبايب قلبى يا سكر
دايماً كده فرحانين
واللى مفرحكم اكتر
ان انتوا مصريين
يا سلام على الرحلة الخلوية
نصحالها قبل الفجرية
على خط السما نمشى بخفة
ونمشى الشمس المصرية
يا كباتن الوطن اظهروا
واتحضروا وشمروا
عن نفسكم تعبروا
وتساعدوا قد ما تقدروا
وخلاص بقيتوا طولى
ايام المذاكرة مذاكرة
وايام الاجازة عمل
تبقالكوا بلدكم شاكرة
وتقول للجميع يا بطل
ع القطن تعالوا
تعالوا شوفوا جماله
القطن حبيبنا
بيعمر جيبنا
القطن فل فى منظره
فى عيد ميلاده تحضروا
عن نفسكم تعبروا
وتساعدوا قد ما تقدروا
فتعلموا وتحضروا
هاتلاقوا روحكم بتكبروا
خلاص بقيتوا طولى
خلاص بقيتوا طولى
غناء: اميرة سالم
اشعار: صلاح جاهين
الحان: محمد الموجى
الاصدار فى: التلفزيون
سنة الاصدار: 1984
التصنيف: اغانى اطفال
- بحسب الخبر المنشور فى جريدة الاهرام الصادرة يوم 6 ديسمبر عام 1983 فأن الاغنية هى اول اغنية يلحنها الملحن محمد الموجى للأطفال وثالث اغنية يكتبها صلاح جاهين للأطفال
- قامت اميرة سالم بتصوير الاغنية للتلفزيون