ما بلاش - على الحجار /اشعار/ سيد حجاب

هنزود ليه في جروحنا بحاجات ما بنقصدهاش

ما بلاش نتعب بعضينا خلينا نعيش ليالينا

واما الأيام تدينا فرحة ما نضيعهاش

ما لناش غير بعض يا روحي عن بعض ما نستغناش

طب ليه تبعدي وتروحي لبلاد ما بنعرفهاش

بتقولي هترجعي تاني ويروق وياكي زماني

ليه نتعلق بأماني يمكن ما نحققهاش

ما بقاش فيه حاجة تساوي نبعد عن بعض كتير

لا انا غاوي دموع ولا غاوي سهد وحيرة وتفكير

خليكي هنا وخلينا نكبر سوا مع بعضينا

دا حنا ان بعدت أراضينا الشوق ما بيرحمناش

ما فيناش فرقة استكفينا الأيام ما بتستناش

دي ان راحت من أيادينا أبدا ما نعوضهاش

هو اللي نقوله نعيده حبنا عمره ما حيفيده

تعب القلب وتنهيده دا احنا لسة ما عيشناش

ما بلاش
غناء: على الحجار
اشعار: سيد حجاب
الحان: بليغ حمدى
الاصدار فى: البوم "متصدقيش"
السنة: 1983
التصنيف: عاطفى