مكتوب الهوى مكتوب
وانا وانت سوا بندوب
ده نعيم الهوى فى عذابه
كداب اللى قالك توب
مكتوب الهوى يا حبيبى
من قبل اللقا بسنين
وحلاوته انى قبل نصيبه
معرفش النصيب مع مين
ياما فاتت عليا ليالى
مخطرش الهوى على بالى
اتاريه انكتب على حالى
وانا لسة يا عينى يادوب
اتألم وغنى يا قلبى
خلينا يوماتى فى حال
لو يفضل حبيبك جمبى
ايه فايدة هوانا امال
ده جمال الجميل فى قساوته
بتزود عليا غلاوته
ويبان الهوى وحلاوته
لما اشكى جمال حبوب
مكتوب الهوى مكتوب
ان فاتنى الهوى استنى
وان جانى عيونى ما تنام
يا سلام لو يوم اتهنى
واتعذب تلات ايام
مش عايزة لقاه على طول
ولا عايزة بعاده يطول
يوم شاغل يوم مشغول
يوم غالب ويوم مغلوب
مكتوب الهوى مكتوب
مكتوب الهوى
غناء: هدى سلطان
اشعار: فتحى قورة
الحان: محمد فوزى
الاصدار فى: اغانى فيلم "جعلونى مجرما"
السنة: 1954
التصنيف: اغانى افلام / عاطفى